呢排的每個星期六日, 成日都同eric四圍行....睇浴屏, 廁所, 電制, 燈, 窗簾.....行到腳都軟!
而家資訊發達, 上網搵到好多資料, 又有好多人願意同人分享心得. 所以今次再買樓, eric在網上收左唔少料. 例如邊度買乜野平, 邊隻牌子好, 邊間係黑店等等. 我地去行o固d店, 好多人都係網友介紹的.
昨日又出動, 去左荔枝角o固邊搵一間電器店. eric接左我收工後就搭地鐵去太子, 佢同我講, 間野在雷生堂附近. 不過eric唔知雷生堂的確實地點! 我地到左太子睇左地圖, 記得o固塊地係三角形的, 所以在地圖上搵到係邊一忽.
行呀行, 終於去到雷生堂. 不過eric唔知間野的確實地址, 亦都無間野的電話號碼! 我地盲目地在雷生堂附近四圍行四圍望, 都唔見到目標商店. 我問, 係咪呢間? 係咪o固間? (亂指d電器店) eric都話唔係, 咁究竟間野叫乜野名架?? eric竟然答我: 第一個字好似係英文字黎的! 我頂! 在家涼住冷氣, 用電腦按幾個制就可以搵到確實地址電話啦! 點解咁都唔準備好, 硬係要三十幾度高溫下曬住咁亂行去搵呀?? ....我已經熱到無晒表情, eric即刻好醒目咁打電話向人求救, 睇下有邊個會在家上緊網可以幫到佢查資料!
最後佢搵到個可靠的, 唔單止攞到店名, 正確地址, 電話, 之後仲收到地圖添! (咁細心, 相信大家都估到o固位朋友係邊個啦!)
我地去左一間食肆叫d野食飲杯野抖下先. 坐低後我就同eric講: lulu知道咁熱天時, 我仲要跟住你盲目遊街, 佢一定係好為我擔心喇! ....跟住eric話, 我估lulu知道出面咁熱, 我仲帶住你迷路的話, 你好大可能會發脾氣....佢應該係好為我擔心至真呀!!
lulu, 究竟當時你擔心邊個多d呢??
ps. 因為eric在網上見到呢間店有好多唔同款的風扇賣, 所以我地專登去睇....點知....咁難先搵到間店, 人地一把風扇都無display出黎!!
留言列表