繼續準備搬屋－HazelECnuts的部落格

上星期比左一個月訂金比新屋業主之後, 我地就格價搵搬屋公司. 報價由$1500~2500不等, 最後揀左一間叫1288的搬屋公司, 開價$1500, 包大件傢俱另加25箱雜物. (抵就好抵, 試過好唔好再同大家詳細報告.)

我地要搬o既物品唔算多(我估), 大件的有床, 麻雀餐枱, 雪櫃, 洗衣機, 5筒櫃, 梳化(?), 雀籠. 其餘就係衫等一箱箱的雜物. (應該在25箱之內掛! )

上星期六日我地好乖o甘在家執野, 由冬天衫開始著手. 嘩! 2個人乜o甘多件褸架!! 有d一年都著唔到一次, 不過就係唔捨得掉. 唔著o既原因有好多, 難襯衫啦, 肥左啦, 厚得滯啦, 太臃腫啦....(買新衫o既時候, 有十萬個原因; d衫買左又唔著, 都可以有十萬個原因!)

我自己d雜物, 早左2-3星期前已開始執, 而家只係執d衫/鞋同家庭雜物. eric早2日開始執佢d私人物品. 佢從櫃頂摷左7-8盒野落黎, 每盒好似A-4紙大少少, 厚5CM左右. 盒面仲貼左英女皇郵票的!! 大家估到係乜野來的嗎??

係英語學習的錄音帶-_-"

我心諗, 掉鬼左佢啦! 連個盒都未拆, 你都無誠意學架啦! 英女皇郵票...今年都回歸11週年喇, 即係起碼係11年前o既野, d學習內容都肯定out晒啦!

點知我見佢逐盒睇下之後, 又pack番好放番入個箱度. 佢話: "我以前一直覺得, 自己有一日會發神經想學英文, 所以佢就訂左成set英語學習的錄音帶番黎."

我問佢: o甘你到而家, 仲係o甘覺得嗎? (其實我係窒緊佢!)

佢答我: 係 (答我好堅定!!)

我: ......(無言...仲想叫佢狠心d掉晒佢添!)

即係呢箱九十年代(可能更耐歷史)的英語學習錄音帶, 將會跟隨我地搬去旺角.

之後仲有d更經典的物品....係一條銀色鐵造成斤重的Harey Davidson皮帶! 可以想像eric的身型戴上呢條皮帶會係咩野樣呢?? 噢! 差d忘記左佢識我之前係華dee o甘o既身型, 開架烈火戰車o既添!! ....不過, 已經係好耐之前的事. 我都只係從相片中見過....所以我都係叫佢"掉左佢". 我估佢唔會掉, 一定會留番黎回味o固段(電單車)同佢一起走過的日子.