3月12日
因為係下午1點半機o既關係, 所以我地可以他他條條o甘訓醒先出發. 由屋企行15分鐘左右就去到巴士站, 搭E23唔駛1個鐘就去到機場.
記得有一次係超早機去日本(上午7點幾), 要零晨5點幾call車去機場.
早機/午機, 真係各有各好! 
衰佬, 偷影我相, 仲話我同賓妹"鍊車"
大家去玩果然醒神d, 未到約定時間已經到齊! 
點名先: nuts仔, 到~.....紅蕃, 到~.....葵花, 到~.....雞尾, 到~
齊人齊雀, 出發lu! 
去仙台的機, 真係好細架. 一行得6個位, 中間一條走廊. 學小蟲話齋: "4-5個鐘頭零娛樂".
不過都唔係o既....機仔細細客人又少, 我覺得d服務好好丫, d飛機餐又好食, 又有蝦人牌雪糕, 都算意外驚喜呀! 最緊要係乜野...梗係有靚空姐啦! 
金金太失敗喇! (定太喉擒呢?!) 成部相機拎出黎對住個靚空姐!
之後梗係比其他空姐"溫馨提示"佢 : 唔該唔好影同事丫!
坐左4個鐘頭機, 食完小食, 午餐, 再小食之後, 終於到左仙台機場.
仙台機場真係好細呢! 臨搭JR出市區之前, 我不忘去機場的詢問處查詢: 請問機場禁區內有無士多啤梨賣的呢? 第一日到埗, 我就已經為回程時的手信做好準備!
呢晚係住" 萩の湯 ドーミーイン ". 酒店離仙台站好近, 一行人浩浩蕩蕩o甘, 帶住行李唓唓聲(好嘈的拖行李聲), 用左15分鐘左右行去酒店.
放低行李之後, 大家爭取時間去左行電器鋪, 睇左一陣相機就去"べこ政宗"食牛舌. 貪佢在酒店附近. 快手食完可以番酒店浸大浴場. 早d休息準備明早出發去松島!
睇相機, 食牛舌. 第一晚行程全部完成!!
ps. 萩の湯呢間酒店好企理, 又新淨仲好平, 大浴場都好正. 唯一美中不足的, 係張雙人床太細, 2個人訓好迫, 轉一轉身都會整醒隔離o固個. 如果有網友要住呢間, 最好比多少少錢, 要2張床的房.
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
<仙台第一day外傳>
點解個topic叫做蝗蟲由香港開始...食...呢?
8名呃食男女隊員check in左行李後, 就去搵個地方坐低飲啖茶食個飽, 當係食個早餐消磨下時間.
早餐o者.....d點心籠駛唔駛疊到合和大廈o甘高呀? 
數一數....嘩! 食左廿八個點心呀!! 想唔認係蝗蟲都唔得啦! 
留言列表
