自從jacky仔死左之後, 家人久久未能平復心情. 屋企總係欠缺左一d野o甘樣, 所以我地就決定去買番隻迷你品番黎, 填補jacky仔的位置, 及填補家中各人心靈上欠缺的一點東西....
o固個期間, 唔知係咪香港唔興迷你品, 寵物店完全無見到佢地的蹤影. (唔買o固陣成日都見; 想搵o固陣就無! 呢個世界總係o甘玩野的! 
)
由於我地好心急, 於是就掀報紙搵d狗販買. 雖然明知佢地d狗多病, 但因為心急....第一次就買左隻身型稍大, 腰骨都彎晒的狗, 佢個樣唔精神啊, 都唔似bb.....不過我地都帶左佢回家, 佢唔靚唔緊要, 希望在我地的細心照顧下, 佢可以健康番....不過最後都唔得, 又睇醫生又餵奶, 只捱左一個星期, 我地都好錫佢, 不過可能我地無緣啦...
大家都無晒心機之際, 我老豆又帶左第二隻番屋企. 呢隻真係好bb, 四肢粗壯. 不過個樣...對眼分得又開, 個咀又短, 點解o甘似外星人o既? 
...佢就係bb蕃薯喇!
有幾細...睇下, 佢個身都係長過了哥少少乍! 好似隻玩具公仔o甘, 好可愛!
大蕃薯原名係叫"TIGER", 係細妹改的.
初黎我家頭一星期好健康, 所以就叫TIGER. 不過一星期後又開始咳, 死火!! 睇醫生, 醫生話可能係狗瘟, 好唔好得番, 就要食住藥, 睇佢自己.
大家個心都好亂, 咩野事呀, 剛剛已死左2隻狗, 呢隻又....啋~ 
於是我就提出, 要幫佢改名做"蕃薯", 佢行步路都跌下跌下, 成舊蕃薯o甘, TI咩野GER丫! 就一於叫蕃薯啦! 同埋捉佢去拜下大佬jacky, 叫jacky仔保佑佢law. 
世事就係o甘奇, 一星期後佢d病徵就無晒, 回復健康喇! 唔止o甘, 身型仲快速變大, 由"蕃薯仔"變左"大蕃薯"! 醫生話未見過o甘大隻的"迷你杜柏文" 
無錯, 佢係"大種迷你杜柏文"! 
bb蕃薯訓飽就食, 食飽又訓, 好快無電. 仲好似bb仔o甘, 半夜會醒, 醒左會鶯鶯聲叫. 為左唔想佢比老豆打, 所以我同細妹2人會輪流起身, 陪佢玩碌狗餅, 等佢追住食4-5粒, 又會番去訓覺的. (諗番起都好搞笑, 辛苦過湊仔!)
老豆原本整左個狗籠在toilet內比佢住的. 不過大蕃薯唔鍾意比人困住, 吠2聲我地就放佢. 因為無左jacky仔, 大家都寵到佢暈, 簡直當佢係皇帝. 直到而家, 佢都未試過在籠內訓. o甘佢訓邊? 咪就係上床訓law! 睇下佢個嘆樣!! (梳化唔正o既位佢唔坐; 唔軟o固張床佢唔去訓!)
因為由細養到大, 所以大蕃薯識得聽好多人話. 食野, 去街o固d唔駛講啦...最離奇係佢知道我地講佢事非! 每次講佢或者笑佢的蝦碌野o固陣, 大蕃薯都會好嬲o甘吠我地, 或者嗚嗚聲鬧我地! 咩野狗黎架! 
除此之外大蕃薯仲非常為食. 為左食, 佢學好多唔同技能同好多唔同指令. 包括sit, down, stay, jump, 握手, 舉手, 執波, 曳抱(通常犯錯時就會雙手搭住人膊頭, 用個心口質落你塊面度以示友好), 打筋斗(見上面中間的相片)....做左動作而又無野食獎勵的話, 佢就會鬧人!
2002年細妹要去澳洲讀書一年, 回來時我地特意安排一個驚喜比大蕃薯....先叫細佬帶佢上天台遊花園, 然後細妹就坐在梳化用衫笠頭, 再叫細佬帶大蕃薯回來. 我地幻想的畫面, 係大蕃薯嗅到細妹陣味然後會好興奮咁吠叫!
大蕃薯入屋後, 無錯係走埋去出動大力"索", 但佢並無表現到好興奮. 相反, 嗅一大輪後仲悻悻然咁走開! 
大蕃薯對住人, 一係好興奮吠&撲; 一係好憎好驚咁吠&避走. 咁樣無聲無氣的走開實在太唔對路! 細妹即時拎開件衫熱情地叫大蕃薯~ 想黎個擁抱! 點知大蕃薯邊走避邊鬧! 原來隻小氣狗覺得｢豬因｣掉底左佢成年, 所以好嬲發脾四! 
最後豬因唯有出動零食刷佢鞋, 先可以和好如初! (大蕃薯就係o固時開始縱壞左....)
轉眼已經養左大蕃薯7年多喇. 今年發覺佢咀邊已開始生白毛. 好fit o既身型開始有肚腩; 玩一陣又無會無電要抖下; 凍少少又縮埋一舊要冬眠.
而家已由大蕃薯變左做老薯(=老鼠), 好應節!
又係o固句, 唔知大蕃薯仲有幾多日子可以同我地一齊生活. 希望佢呢一世做我地家人(家
?!)都係開心的!
~~~~~~~~~~~~~~~~~~~~~~~~~~~~~~~~~~~~~~~~~~~~~~
<~2014>
我地姊弟未搬走時, 佢每晚好盡責走3張床陪晒我地瞓, 係屋企最重要嘅成員之一! 每日收工回到屋企附近吹口哨, 大蕃薯就會用最熱烈嘅吠聲歡迎我地, 直到我地入屋為止. o固陣成日話, 成個山林道嘅人都知我地返緊屋企!
近年大蕃薯已經吠少左好多, 亦唔係見到每個人都吠. 不過我每次回去佢都一樣會吠我! 我都搞唔清楚佢係開心, 定係鬧我咁耐唔返來睇佢!
14年來多得大蕃薯陪伴, 帶比我地好多歡樂. 亦多得Jacky仔保佑, 十幾年黎都無乜病痛. 最後2年雖然做過3次手術, 都能平安渡過. 最終係敵不過身體機能的衰退, 在2014年12月30日零晨因腎衰竭而離開我地.
大蕃薯, 多謝你在我地生命中出現過! 永遠懷念你!
留言列表
