都唔知幾多年未試過10點就訓....由於之前一晚太早訓, 第二朝倒塔咁早就醒左. (都唔知幾多年未試過5點幾就醒, 仲要訓唔番!
)
唔通山林中真係特別凍? 我浸完一個晨早溫泉之後, 就換衫出去行下. 見到停車場d車的擋風玻璃結左層冰! 
昨日聽到同事話, 行半個鐘就有小賣店, 途中又有湖. 橫掂咁無聊就出去行下啦! (我信得過自己, 唔會走左入森林迷路囉! 
)
離開旅館10分鐘左右, 就見到個好靚嘅湖景! 好開心呀! 
湖面有層煙, 唔通d水係熱嘅? 
當然唔係啦...好似話水面溫度凍過水溫就會咁喎! 
諗住影低湖中鴨仔游早水個樣, 突然聽到拍翼聲, 唔理喇, 即按快門影左先! 
唔覺意比我影到2隻鴨仔輕功水上飄呀! 
好鍾意呢張相呀! 
等左好耐, 終於等到7點幾, 大家起身食埋早飯, 就出發去山長水遠的"高千穗"喇!
~~~~~~~~~~~~~~~~~~~~~~~~~~~~
無高速公路去高千穗. 由別府出發的話, 車程要成4個鐘! 
(唔係我日本老細堅持要去的話, 我一定唔會編呢個行程!)
由於之前一晚我地已坐左個半鐘車向呢個方向進發, 所以今日坐多2個幾鐘就可以去到.
司機大佬好心通知我地, 會路過呢個酒窖, 問我地有無興趣落車行下. 咁長車程, 乜野都落車行下睇下啦! 
呢個山窿原本係掘黎比鐵路通過的. 不過山窿濕度好高, 掘掘下出現滲水問題解決唔到, 所以就停工變成一個儲存清酒的地方!
賣店外掛左d七彩鯉魚旗, 加埋後而d櫻花, 好靚呀!
再繼續坐多陣車, 就去到目的地: 高千穗!
由停車場行落山峽, 大約半個鐘頭. 呢度個賣點, 就係呢d由N年前火山爆發而形成嘅岩石同瀑布. (其實個瀑布唔算壯觀囉!) 
原本可以坐船仔, 不過一個月前曾經跌過d石頭落黎, 所以而家只可以遠觀.
仲有呢度出名嘅"流水麵". d麵由竹條上向下流, 要鬥快夾黎食. d麵只係凍嘅白麵條, 我覺得係貪得意, 玩多個食囉!
離開高千穗, 我地就重回高速公路, 去亞蘇火山.
之前聽網友講, 有時會遇到風向問題或者火山氣體濃度, 會引致不能登山. 今次我地好好彩, 可以順利上到山, 又睇到火山口. 亞蘇火山咁出名, 大家總算到此一遊, 都好開心!
離亞蘇火山不遠, 就係我地今晚入住的"湯巡追莊"溫泉旅館.
呢度有好多活動, 女士可以揀自己鍾意的浴衣; 又有表演, 又有乒乓波等室內活動. 原本我以為我d同事會一齊玩...點知飯後, 大家都解散各有各hea.
我以前都住過好多間溫泉旅館, 不過呢度d房真係好正! 每間房內有自己的露天溫泉, d房又靚又大! 我同我的女同事去便利店一人買一個甜品, 邊浸邊食, 正呀! 
呢晚食完飯浸完溫泉, 就比隔離房的男同事叫左過去開"聲討大會", 邊飲酒邊講對公司的不滿! 
嘩!...各人d怨氣都好大! 聽講我日本老細o固晚聽完訓唔著囉! 
留言列表
