HazelECnuts的部落格

入左伙就快2個月, 睡房的大衣櫃終於有櫃門喇! 真係等到頸都長!

9月入伙前送來的櫃門, 有漸變色效果!  ...即係唔同色!! 頂佢唔順要佢拆走晒d門重新造做過!

重做的櫃門, 改設計跟床頭板一樣有橫紋, 效果比之前的好!  雖然d色都好似...不過算啦, 整左d紋無咁覺深淺色囉!

今次終於可以裝埋床尾的梳妝枱喇! nuts個籠可以有瓦遮頭, 唔怕冷氣吹正個籠!

(間房無那那多左咁多黑媽媽的櫃門同梳妝枱, nuts好鬼驚, 一放佢上籠頂, 佢就急急腳爬番入籠內!  )

估唔到幾件傢俱都要搞左幾個月. 設計雖好, 但d廠做出黎的貨又係另一回事.

而家仲欠2個鞋櫃門未更換, 今個星期應該可以搞掂晒! 雖然d傢俱有好多唔完美的地方, 顏色同木紋又跟最初揀的有出入, 不過實在拖得太耐, 無心情氣力去再拗數.

在網上得知, 好多設計公司將d傢俱做到錯晒之後, 就咁爛尾收場. 呢間公司肯跟進, 更換, 扣錢, 已經係"好負責任!"   希望快整埋餘下d野, 快d找埋數比佢地, 就可以同佢地斷絕關係, 脫離呢個追貨, 追人裝櫃的日子.  

~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

以前屋企向東/北, 夏天朝早8點太陽曬入全間屋, 燦眼到要或者拉埋窗簾.

到左冬天太陽就唔知去左邊, 仲要食晒北風!  記得朋友話: [估唔到尖沙咀會凍過天水圍!!]

而家呢度向西南. 初搬入黎時, 見到太陽只係曬到窗邊. 估唔到而家踏入秋冬, 太陽仲曬多左入屋! 原來座向真係好影響家居生活環境呢!