HazelECnuts的部落格

快樂不知時日過, 轉眼大蕃薯已經9歲. 呢2年見到佢老態盡現, 咀邊同身的毛好多都變成白色, 對眼又已經開始朦. 呢舊蕃薯已經由手掌咁大的"bb薯"變左做"老薯"

上星期發現大蕃薯有d古怪, 只可以抓住梳花邊好想上黎, 但後腳就無力跳唔到上梳化, 嗚嗚聲咁慘叫.  之後抱佢上去坐低, 用平時同佢玩的方法向前拉佢對手, 正常佢會將對腳反後伸直的...不過佢做唔到呢個動作, 死都夾實對腳, 曲住腳咁坐.

帶左佢去睇醫生, 照左X光片, 醫生話佢可能跳得多, 脊骨中間的幾節增生, 已經差唔多掂到神經線. 佢伸唔直對腳, 就係可能佢用力跳躍時令到神經線被壓住所以覺得痛. 如果情況再惡化, 可能以後會癱瘓行唔到! 知道原因, 我地只可以制止佢企起身"扮人", 盡量要佢做番一隻狗! (即係4隻腳掂地 )

好在休息左3日, 已有好轉, 可以自己跳上梳化! 可能佢自己都知死, 而家有人番屋企, 佢只會興奮咁狂吠, 唔會再好似以前咁企直個身喇! 真係好彩...

搞掂對腳, 順便問埋醫生的意見....大約一年前左右, 發現大蕃薯心口有水泡, 薄薄一層咁樣. 到左今日, 個水泡已經變左乒乓波咁大. 於是醫生幫佢覆診之後就順手幫佢抽左d細胞去做化驗. 今晚就去聽報告....希望Jacky仔保佑老薯無事啦!   

諗番佢來我地屋企o固陣仲好bb, 成日要訓覺. 半夜一晚醒幾次, 又要我地陪佢玩碌狗餅. 好似唔係好耐之前嘅事. 而家見佢身體機能衰退, 真係好心痛呢!  可幸佢在我地屋企咁耐都係嘆世界; 希望到佢有一日要走o固陣, 都唔駛捱苦啦!   大蕃薯你要保重呀!

~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

晚上去聽到報告...呼~ 好在醫生話佢心口個瘤係脂肪瘤, 唔係惡性瘤, 暫唔無必要take action! 真係多謝Jacky仔保佑老薯, 等佢"做狗"捱多幾年!