HazelECnuts的部落格

除左我地新屋入伙之外, 我哥都係今個月舊屋搬新屋. 佢只係同一個屋苑內, 細屋搬大屋, 所以簡單好多!

第一次同大嫂哥哥一家人一齊開party. 我都係在上年尾結婚酒宴時同佢地見過一次面, 好在佢地同我地呢個愛登士家庭溝通得到呢!

大嫂的姪女係好好笑的小妹妹 (好在唔係麻麻煩煩o固d公主!) 佢同佢亞媽打wii時玩劍道鬥扑...佢把口一邊叫住"細力d"(打亞媽), 但個人就勁落力咁扑! ...睇下佢對手拗晒去後面! 駛唔駛咁出力呀?

*此小妹妹依輩份叫我亞哥做"姑丈", 我亞哥接受唔到, 要佢叫番"哥哥"!  

又到肥問攞分嘅時候喇!  唔食蝦嘅人要負責處理晒成盒牡丹蝦, 幫佢地剝晒d殼, 只留番一頭一尾方便大家進食! 肥問, 你係得嘅!

肥問在廚房忙緊處理魚生時, 2個亞媽就o係度嘆世界!

我亞媽仲露2手, 學人玩wii打保齡添!  雖然佢唔識控制, 成日碌左個波去"觀眾席", 但又符符碌碌中左2次全中喎! 真係估佢唔到! (你睇下佢個樣幾認真! 有晒姿勢架! )

豪宅日與夜景觀....大概最值錢就係在呢度吧!!

大食會, 亞媽點都要出手嘅.....

開飯喇!! 北寄背下面張相的皮蛋豆腐係我整架!  之前見到亞蘇示範, 我又上網搵左個最簡單的整法, 好在大家都好捧場食晒呢!  (只係豆腐+皮蛋+蔥粒辣椒粒+麻油鼓油+豬肉鬆)

食完飯又再打機....呢張相令我諗番起廿年前d細佬妹爭機打的情景呢!

因為2個細佬的生日只相差2日, 所以多數都會一齊慶祝.  

2009生日

1999年生日

1985年生日(應該無計錯)

~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

俗語有云: 走得快好世界....

咁大張枱走剩2個人, 睇下邊個咁唔好彩比秦始皇咬實唔放先...

由開飯無耐, 秦始皇就借頭借路由"揸筷子"打開話匣, 再燒到"同時間養17隻狗"...."船民中心管X千人"...."開lounge時咁咁咁"...."代表Y記出trip去日本, 加拿大開會".....  

我地在另一邊客廳係咁偷笑, 因為在座所有人個個都聽過秦始皇呢d歷史無數次!!   72年xxx, 83年yyy, 9x年zzz....足足用左3個幾鐘將呢三十幾年的大事同人講晒!! (如有遺漏, 下次再補充! ) 話題完結嘅原因, 係因為已經12點太夜, 再唔走就無地鐵坐喇!  

秦始皇今次的舉動, 令我諗起西遊記內的家英哥! 佢真係可以用音波功煩到你自殺! 唔知大嫂個亞哥有無比佢嚇怕呢?