HazelECnuts的部落格

在新家住左一星期, 新生活係...

1) 收工好想快d番屋企(雖然以前都係). 夜晚唔願落街食飯, 唔願去行下/買野. 而且覺得呢度相對旺角黎講, 太少店鋪無乜野好行! (就係住宅區同商業區的分別!)

2) 唔知道由新家番工需要幾多時間. 星期一第一日番工, 竟然塞左45分鐘  ... 今日又只需要20分鐘! 相差一倍時間, 點預呢?

3) 收工時要好專心記住自己搬左屋, 我要行去搭x號巴士回家. (以前行呢條路, 通常都係出尖東的. 昨日分左心, 差d就上左天橋去尖東喇!)

4) 仲未記得d野放左去邊個位...要逐個櫃開黎搵, 日日好似尋寶咁!

5) 未組織好每晚回家後做野的程序...究竟一日裡面, 係咪臨訓前先吸塵好呢? 而家係磚地, 有條頭髮在地上都好礙眼呀!   (原來啡木地板都有佢嘅好處, 就係有塵污糟都唔覺! )

6) 呢度好靜(相比起旺角尖沙咀, 簡直差天共地), 靜到nuts在屋內大叫一聲, 間屋會有回音.  唔知會唔會加快左我地"業餘性失聰" 嘅速度呢?

7) 忙執屋, 整呢樣o固樣, 搞到唔記得餵nuts仔食晚餐. 過左9點, nuts就會好忟+係咁發脾氣! (nuts仔: 到我食飯未呀? 好肚餓呀!! ) 

ps. 而家先知, 屋企的電筒原來好慳電. 上星期入伙, 因為風水關係, 入門口時要開著枝電筒直至佢無電為止. 枝電筒到今朝仲係著緊, 已經足足照左我地一個星期喇!