上星期日仲同eric忘我咁清潔新屋洗左4個幾鐘, 搞到腰酸背痛. 到而家剛好一個星期, 終於可以安安樂樂樂咁在新屋上網報告情況!
上星期因為傢俬鋪通知話要遲送貨, 所以搞到我地咁趕. 到星期二下午終於等到佢送貨. 送完貨又要等師傅黎裝欽. d師傅真係"我急佢唔急", 慢慢食埋晚飯8點幾先黎裝傢俬!! 
(大佬, 你公司遲起貨, 我地2日後就要入伙喇! 你地仲咁滋油!)
到佢地開始裝欽之後, 我地先落街食飯. 食完飯回來見到其中一件床頭櫃的配件, 
咦?? 點解咁嘅色嘅??!! (我地d傢俬選用2隻色: 廳係深啡胡桃木色; 房係淺啡黃的木色. 而家全部傢俬做晒胡桃木色!! 邊有錯得咁離譜架! ) 
eric係咁嘈, &即call個disigner.....佢聽到都知大鑊
, 即飛車過黎睇. 睇到無用啦! 唯有睇下點解決. 當然, 佢地唔會重新做過房的傢俬比我地, 只會睇下有乜折衷辦法. (佢話做過都大鑊, 唔通我新屋入伙訓地下咩!) 個designer都算係咁, 佢同公司講左好耐電話, 話我地好不滿. 之後回來同eric講, 話開個價, 由尾數度扣錢作補償.
之前eric在網上都睇唔少傢俱出問題的事, 都知好多黑店. 見佢話肯扣錢, 心諗頂多都係扣3幾千....估唔到佢都幾闊綽, 一開口就話扣$6800. (我地成屋傢俬都係講緊36000乍!) 金額唔細, 我地又無時間等佢再做, (加上我都鍾意呢隻胡桃木色! 
) 所以我地都接受左扣錢的方案. (其實佢都唔想再做新的比我地, 所以又話需時2個月, 又咁咁咁, 用錢解決係最簡單的了.)
之前睇圖紙仲覺得好仔細, 好有信心的. 不過原來同出面講的一樣: 畫圖紙係一樣野, 做出黎又係另一樣野. 顏色偏差啦, 木紋錯啦, 仲有好多錯誤的細節. (早知當初就唔駛花咁多時間去揀顏色, 揀木紋款啦!) 簡單d講, 件實物跟圖紙比較, 只有80%相似 (相似 - 即係指個外型only. 遠睇可以呃到人嘅! 
)
我而家搬得入黎住, 其實已經覺得好開心
(趕得切入伙, 安樂晒!), 係eric比較失望(因為佢有太大期望喇! 加上整個過程, 佢覺得跟網上睇到的黑店case好唔同, 所以佢好有信心呢!) 雖然eric失望, 不過佢都知, 比起網上大家講的黑店, 呢d錯失都唔算好嚴重. 最少d傢俬外表呃得到人, 實際又無穿無爛裝得入屋, 又用得囉! 
~~~~~~~~~~~~~~~~~~~~~~~~~~~~~~~~~
講番搬屋前的準備...由於之前旺角間屋太細, 我唔可以太早開始執野. 要等到搬屋前的星期日, 亞媽黎拎走部洗衣機同d櫃, 先有位pack箱執野.
一直以為上次搬屋時, 好多野無拆箱, 今次執野會好輕鬆. 無諗過, 搬屋前的一晚, 我地要執到半夜3點, 先pack好晒所有野!! 
搬完屋之後, 又急住想執好間屋, 所以呢2晚都3-4點先訓. 訓醒又開始拆箱, 執呀執, 執到不知時間, 好似喪屍咁....昨日到左下午4點先食第一餐! 2條友又唔知肚餓, 又唔識眼訓, 只有對手同對腳有少少知覺, 會覺得酸痛. 
今日趕住執好間屋, 頭先我d屋企人搶先黎左坐下, 睇下新屋, 佢地都覺得好好呢! 我姨媽仲話寧願做nuts仔, 可以住新屋, 食好味道, 又唔駛做喎!
黎緊要慢慢分配好d野點擺, 慢慢執番好d野.(而家只係將d野唔知塞晒入邊個櫃度, 實行眼不見為乾淨! 
) 今次辛苦完, 我估我10年內都唔會再搬屋! 真係怕怕! 
請大家比d時間我地, 等埋傢俬鋪黎執漏, 整好晒之後先請大家黎坐下啦! 
(坐下好喇! 我地仲要抖番一排先回到氣, 唔好叫我煮飯比你地食呀! 
)
(相片後補)......今晚終於可以早d訓! 
留言列表
