HazelECnuts的部落格

收左樓2個星期, 新屋已完成起底及重新批灰. 而家等緊油漆...好心急想睇下我面黃色牆係點呀!

裝修進行的同時, 我地都已經同設計公司傾好大部份傢俱的設計. 初初我一直好擔心, 設計公司係咪真係可以做到我心目中想要嘅野呢?  直至而家, 我好滿意個project designer. 感覺上係朋友feel!  (好難得有人可以咁短時間內取得我信任啊! )

最後一次見佢傾埋d野時, eric同佢講, 好期待見到佢的設計成品.  (哎呀, 我搭車過去時, 個心都係咁諗架! 比eric搶先講左添!! )

1. 在客廳入門口位會有個L形的櫃, 近門口位置主要係鞋櫃. 向廳的一邊, 就會擺放雜物. 上層就係飾櫃, 比eric擺獎杯.

2. 電視地櫃. 最右邊的一舊可以拉出黎做茶几. 以前舊屋都係咁, 用過覺得呢個設計好方便!

3. toilet的鏡櫃. 雖然大家話而家唔興鏡櫃, 不過我鍾意將d野收晒入去整齊d.

4. 睡房的大衣櫃. 咁大個櫃, 又可以繼續買衫喇!!

5. 地台床. 地台下面可以掀開擺放行李喼及換季d衫咁. 有好多空間!

6. 右下的一舊就係屈佢送埋的梳妝台...之後仲順手屈佢整埋張櫈仔襯番一樣色添!

以上埋單$36,000. 之前都初步問過其他設計公司報價, eric話有d開價平少少. 至今我地同間鋪都傾得好開心, 無不愉快事件發生, 所以我覺得(假如真係)貴左少少都ok的!

不過我要等收埋貨, 睇過無問題先幫佢地"賣廣告". 暫時就唔公開間店個名住喇!