HazelECnuts的部落格

同朋友講開灰鸚的性格, 真係隻隻不同.

nuts仔由細比我地訓練慣, 可以上人手, 比人摸頭, 背或者翼底都唔係大問題, 最緊要事先講定"摸摸~" 或者"RR~", 就可以摸或R 3下咁多. ( 請勿超過3下, 多謝合作!)  

以前拎佢上手, 要佢反轉, 或者罰佢在我左右手上"行樓梯"都好, 只要佢錫我, 我就會順佢意放佢一馬的. 所以朋友黎同佢玩(即係玩佢), nuts想逃走時, 就會係咁伸個咀去人地度要鍚錫, (三唔識七都錫人) 希望人地放佢番去個籠度.  (記得在舊屋時, 金金仲以為nuts伸長個咀埋去係要咬佢! 真係不解溫柔!)   

~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

nuts仔臨訓前, 習慣企在籠頂等我同佢唱首歌(吹口哨). 我唱歌時, nuts喉嚨會郁, 好似痰上頸咁. 有時會中途搭咀唱埋一份, 仲會左右擺動佢肥胖嘅身軀.  唱完歌我指住個籠, 佢就會自己爬番入去訓覺的.

昨晚臨訓前佢又等我同佢唱歌, 不過比eric搶先唱左. 但係nuts係呆雞咁企o係度, 無表情無動作, 真係好唔比面eric呀!  

eric唱完歌, nuts全程無反應. 到我再接住唱, nuts即刻就擺身同郁喉嚨!  個衰仔擺明當eric係隱形的! 明明細個都唔係咁的, 唔知點解越大越臭串....