今日我地係坐傍晚6:10的機回港. 預計坐3:20的skyliner出機場, 都仲有大半日可以去"最後衝刺". 
我地晨早拎晒d行李落lobby, check out之後, 就去築地食豐富早餐. 上次我係近中午先去築地, 超多人呢, 食飯都要企o係度. 今次早d, 9點幾, 就無咁多人, 舒服好多.
我原本驚奶奶&二伯唔接受魚生飯, 仲懶醒搵晒附近d拉麵/牛肉飯店舖資料. 點知經過5日"特訓", 佢地都已經接受左食魚生. 於是我地就齊齊食正正雜錦魚生飯做早餐喇! 連奶奶都話, 日本d魚生正過香港的好多呢!
食完正野, 我地就在築地行下d乾貨鋪. 奶奶果然係"最後衝刺", 佢已經唔再問d野幾多錢, 算唔算貴. 一睇啱或者試食過好食的, 佢都要買番去做手信. 
我覺得最最最搞笑嘅, 係豆腐皮壽司的 豆 腐 皮 ! 
奶奶真係買番去送比人喎! 
梗係唔少得買又香又甜嘅士多啤梨啦! 我要3pack, 奶奶又話要3pack...真係唔執輸喎! 
之後仲買左乾瑤柱, 冬菇 ....回到上野, 再去二木買零食, 磯燒元貝. 買完野塞晒入行李之後, 仲有好多時間. 我就再同奶奶去行多次上野公園. 今日有d太陽, 我地就再影左d相.
行到去d日式小食攤檔, 奶奶仲主動話要食お好み焼き! (果然有食力!) 雖然我好飽, 不過梗係會陪佢食啦! 
食飽飽我地就坐skyliner出機場, 東京6日之旅就完結喇!
雖然呢個6日行程對於我黎講係普通d, 但又幾辛苦喎! 不過都有意想不到嘅開心. 上星期六回左去奶奶度食飯, 佢講番去日本d野, 仲係好興奮呢! 
嘿嘿...我一去到, 奶奶就同我講, 三姑同六婆都讚佢新抱(即係我
)咁好, 請佢去日本玩. 人地d新抱就淨係識叫奶奶幫手湊仔煮飯乍! 
當晚我問幾點開飯, 話好肚餓時..."出面有d雞胸呀, 你食住先啦, 唔駛等"
拎煲湯出去時..."你唔好拎啦! 咁重, 好熱架!"
食飯時..."你食菠蘿啦, 你鍾意食, 食多d啦!"
睇黎, 我呢個東京bb班之旅, 可以改名做東京"加分"之旅喇! 
今次仲唔攞晒分! 
留言列表
