HazelECnuts的部落格

第二朝7點幾就比公園亞伯耍功夫的聲音嘈醒, 於是我地就執埋d行李check out. 今日我地會租車由上野出發去箱根玩, 然後住一晚溫泉酒店的.

開車無耐就上左首都高速 -> 東名高速 -> 小田原厚木道路 -> 箱根. 全程大約93km. 由於一直在高速公路上, 我唔駛幫手睇GPS, 感覺得好輕鬆.

慶幸一路上都無塞車, 開到東名高速一段景觀仲好開揚, 又望到海, 舒服到不得了!  我地中途停左2次休息站, 入去食d野, 買下手信&比eric休息下. 最後用左大約2個幾鐘去到箱根.

今次又係租平d的mazda車特價plan. 見到架車時都覺得唔太新淨, 再在GPS輸入目的地資料時, 都覺得個GPS好舊.....不過見佢仲識用電話號碼搵到箱根酒店的地址, 仲信任左佢添. 點知就比佢冼左第一鋪.

我睇住路牌知佢真係去左箱根的, 不過佢點左我地去一個乜鬼箱根區役所.  好在我地已經去到箱根湯本站的附近, 加上我做左功課睇左地圖, 所以最後唔靠GPS都去到酒店.    

~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

因為時間尚早, 未有得check in住. 我地擺低架車之後就馬上出發去玩.

我地先搭電車由箱根湯本搭到強羅站. 因為依山而行, 部份路線係Z型咁行. 即係去到某幾個站, 司機要落車由車頭行去車尾...用車尾o固邊黎開車的.  

到左強羅之後, 我地出站外八左一陣, 睇下d手信精品, 再轉另一架纜車再去早雲山. 之後轉乘吊車(?!)去大涌谷.

大涌谷的地面有白煙冒出, 又有陣陣硫磺味. 奶奶第一次去到呢d火山區, 覺得好新鮮呢!....去到大涌谷的指定動作, 就係買黑媽媽的溫泉蛋黎食喇!  一包包溫泉蛋剝開仲係暖的, 天氣咁凍食d暖野啱晒! (suki, 你知點解你隻箱根版MCC頭上會有隻黑蛋啦! )

當日雖然係陰天, 不過在大涌谷的山頂上, 可以清楚咁見到大大個富士山.

在大涌谷遊覽左一輪, 食d野之後, 我地又繼續坐纜車落山. 去到蘆之湖時, 好好彩趕得上呢班海盜船, 唔駛在碼頭食風等多半個鐘.

旅行時真係會有無窮力量的....舺板上簡直係十級風, 不過奶奶都堅持要在上面欣賞蘆之湖的風景! 勁!!

落船之後我地轉坐巴士回箱根湯本站附近. 見d手信店未關門, 又爭取時間逐間店去試食同買手信, 之後先行番酒店check in.

我揀呢間喜仙莊的原因, 又係貪佢近車站. 萬一夜晚肚餓, 都可以行去車站附近的便利店食下野丫ma.  (其實去日本旅行不停咁食食食, 有幾可會肚餓丫!) 

去到酒店已經6點幾....放低行李換件衫就到食飯時間. 見到滿枱都係食物, 好開心呢! 開飯喇~

酒店有男女室內大浴場, 另外仲有一個半露天的溫泉. 每間房都有獨立時段可以用呢個露天溫泉的.

奶奶第一次浸日式的溫泉(即係剝光豬), 出發前佢都係咁話驚驚地的. 食完飯後, 我地安排左個時間比佢一個人去浸. 佢浸完話好舒服, 之後都唔理得咁多, 跟埋我一齊去大浴場同其他住客一齊浸呢! .... 不過佢仲係擔心會有男人撞入黎! (因為大浴場度門無上鎖)