在箱根的溫泉旅館住左一晚之後, 第二朝食過酒店的早餐, 又繼續出發去玩喇.
第一站係箱根的"玻璃之森" (ガラスの森). 由於唔係在車站附近, 所以對上幾次想去都去唔成. 今次自己開車, 終於可以一償心願喇! 
未入場, 已見到門口有一棵"玻璃樹", 在太陽底下, 就會反射閃出彩光, 好靚呀! 
(可惜當日陰天, 所以只係得2分鐘左右見到太陽伯伯&彩光, 其餘時間都只係見到一堆白色乍! 
)
話明玻璃之森, 就梗係睇玻璃架啦! 場內有唔同展品, 有d係有歷史價值的古董; 有d就好似右邊的後現代玻璃藝術品. (從此, 玻璃鞋唔再係女人嘅專利! 
)
除左室內的展館, 仲有好大的戶外花園, 有唔同的玻璃樹, 玻璃瀑布做裝飾.
搞乜鬼我同奶奶著到咁?! 因為o固度有得免費借呢d歐洲古代嘅衫同面罩黎玩. 其實我無乜興趣, 不過奶奶話未試過著, 橫掂唔駛錢就想玩下, 所以就捉埋我一齊玩"易服"囉! 
就在我地易服出巡去公園, 覺得無太陽好可惜之際, 仲好似落起毛毛雨添! .... 咦, d雨飄飄下嘅? 
正當我地研究緊呢d係雨定雪o固陣, 就有女職員走出黎同我地講, 因為落雪怕整濕d衫, 所以叫我地番入去室內. 嘩! 落雪呀!! 真係比我講中, 見到櫻花又見到雪喇! (雖然只係好細雪, 不過我地都好開心呀!)
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
離開玻璃之森後, 我地就繼續向掛川出發.
雖然hh之前話掛川城無乜特別, 不過因為成個行程都無見過日本城堡, 所以我地都決定兜去行下. 估唔到開滿櫻花又幾靚喎! 真係無黎錯!
我地都有行上掛川城, 仲比錢上埋城堡的頂部. 上面可以望到四周的景觀, 望到好遠. (不過真係無野睇, 在外圍影下相都已經夠.)
睇完城堡已經2:30, 我地又急急離開, 因為唔肯定花鳥園的表演係3點定3點半開始.
3點到達掛川花鳥園入口, 噢! 個show真係3點開始! 
我地即刻跑去表演場地...今次的貓頭鷹表演改左在戶外地方做, 感覺無之前在室內的好睇...因為戶外場地太大喇! 觀眾席又遠....不過奶奶同二佬唔係雀痴, 所以佢地已經覺得好好睇.
花鳥園內最多的, 依然係太陽鸚鵡. 見到d太陽堆埋一齊玩到碌地好好笑!
奶奶見到d雀咁近都唔驚人, 覺得好得意, 好開心, 仲成日想摸身邊路過的紅鶴同孔雀, 不過次次都摸唔到的!
2隻孔雀交頸呀....之前都只係在小李子的blog見過佢d Love bird交頸. 今次咁近距離, 仲見到2隻孔雀個樣都好冧呢! 
呢隻灰鸚鵡仲係乖乖的, 唔怕人又肯同我講野. 今次見佢多左個伴相信會無咁悶, 不過佢就唔肯上手喇! 
左下呢隻唔係毛公仔, 而係貓頭鸚bb, 話剛剛出世無耐, 仲未識企起身. (d毛好肉酸呀, 個樣都唔似貓頭鷹!)
右下的都係bb, 都睇到佢係一個企鵝樣. 見佢個樣咁笨, 仲諗住偷襲佢, 快手摸下佢背脊. 
點知佢只係個樣生得笨, 動作不知幾快, 隻手未埋到去, 佢已張大個口想咬我...抽水行動失敗!! 
我地又餵雀, 又餵駝鳥, 仲有企鵝
...不過可能星期日, 太多人餵食的關係, 原本要餵食的目標企鵝, 死都唔開口! (好唔比面
) 所以我地只可以拎d魚去餵池內的企鵝. 嘩! 佢地反應好好, 跳晒上水面搶食呀! 
接近收工時間, 就可以免費拎d糧去餵雀雀, 拎多幾杯糧, 就變成咁....上面隻太陽飛埋黎就降落企o係奶奶頭頂! 咁又係, 奶奶個髮型又幾似雀巢嘅! 
我地玩到5點幾, 又到左太陽鸚鵡群飛的時間. 真係好壯觀呢! (成班太陽一齊飛固然之壯觀, 佢地一齊大叫的聲音就更加...
)
今次仲見到2隻灰鸚跟埋d太陽一齊飛, 一齊叫, 好搞笑呀!
我地今次玩到人地關門咁滯先走! ...諗諗下, 有邊次唔係玩到人收工先走丫!
由掛川回東京要2個幾鐘頭車. 因為知道近東京的一段東名高速有交通意外, 會塞車, 所以我地就索性在海老名的SA食埋晚餐先繼續回程. 食完飯之後, 果然條路已通番呢!
雖然我地懶醒咁避過左一次塞車, 不過回到東京, 都係難逃"首都龜速"的塞車命運. 再一次證明, 在東京市區內係唔適宜開車的! 
留言列表
