4月13日
石ノ森漫画館-----菅生PA(休息站) -----蔵王温泉
菅生的休息站比起上次去掛川時的途經的休息站較遜色.
不過呢度都有熱辣辣o既食物, 有手信店, 有toilet....對於長途車程黎講, 呢度就係沙漠中o既泉水!
早上在酒店食過早餐後, 就無食過野! 所以1點幾黎到呢度時, 我已經好肚餓! (全個旅程可能就係得呢一刻肚餓過!
在大家猶疑不決, 唔知食飯定食拉麵時, 我已經買左咖喱牛利飯黎食!...好好味!
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
再開多個零鐘頭車左右, 終於去到纜車站蔵王ロープウェイ喇!
泊好架車之後, A車司機E先生又變身! 今次唔係變超人, 而係變米芝蓮呀!
未上雪山, 淨係睇到d雪已經覺得凍. 所以第一件事著番晒d羽絨背心同防水褲先!....哎呀! o甘狼狽o既時刻比人偷影左添!
可能係3月中, 已經過左旅遊高峰期. (開始無樹氷睇) 所以架纜車都無乜人. 有位坐之餘仲可以影番張合照添!
(相對blog友小蟲1月份係"迫過番工"的話, 我地呢d就叫做非煩忙時間! 
)
蔵王纜車分2段:
1. 山麓線 (蔵王山麓駅～樹氷高原駅)
2. 山頂線 (樹氷高原駅～蔵王地蔵山頂駅)
買飛時, 我想買晒2程纜車的來回飛, 因為平d少少. 不過賣飛的姐姐仔唔肯賣, 話如果天氣差, 隨時會停駛上蔵王山頂的一段路喎. (吓! o甘咪無得睇樹氷!!
由樹氷高原站望番落去山腳. 對面的雪山, 白色+啡色, 好靚!
嘩~ o甘斜...o甘直至o岩! 係滑落黎定碌落黎呀!
唯一的一間餐廳, 可以避下風, 食少少野. 我就飲左一杯特濃的熱朱古力! 正! 飲完個人暖番晒!
E先生第一次見到o甘多雪, 好開心! d積雪高有佢o甘高呀! 可惜無睇到落雪啦!
佢仲扮晒野, 在餐廳外拎人地d雪板黎影相, 搞到個個見到張相, 都問我佢係咪識得滑雪
天氣真係好唔穩定, 一陣大風, 前面已經矇查查, 乜都睇唔到....又難怪佢停駛上山頂一段纜車o既!
o甘遠黎到, 無得睇樹氷喇!
影左一陣相, 我地就落番去蔵王温泉附近的小街行下.
溫泉鄉即係溫泉鄉....睇下, 連坑渠內都係流住溫泉水架!
d雪一層層, 好似棉花糖呀!
呢度都有無料足湯, 比人免費浸腳的.
無諗過蔵王溫泉o甘出名, 佢o既觀光點, 手信鋪會o甘少!
行左一陣, 都無乜野睇, 我地就出發去上山溫泉酒店.
今晚我地係住古窯溫泉旅館, 全程最貴呢一晚酒店, 所以都係早d check in去嘆下先啦!
蝗蟲部隊又黎.....食呀!!
好精緻o既MENU!
今餐仲有日本東北名牛: 米澤牛
唔係"納米牛"呀! 宗團友!
酒店counter的人, 同我地講個餐要食2個鐘. 我地蝗蟲團黎架ma, 影晒相+食, 唔駛個半鐘已食完離場!....效率o甘高, 唔知會唔會嚇親人呢!
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
酒店範圍內, 有一個N年前遺留落黎的古蹟, 就係古代人要黎燒陶瓷的"窯", 所以呢間酒店順理成章就叫做"古窯".
黎呢度住有一個特別節目, 就係可以比錢買隻白色o既碟, 在上面畫上圖畫, 上埋顏色交比酒店, 佢會幫你燒好, 當紀念品帶走.
我自己知自己事, 讀o甘多年書美術都係...
團友宗女搶住話: 我畫呀! 邊度比錢呀? 我想整一隻呀!
等我以為佢畫畫好叻!...點知最後都係要9爺出手. 9爺用鉛筆畫幾筆, 嘩! 成隻葵花個形已出左黎!
等9爺畫完+上埋色之後, 就交番隻碟比宗女"提番幾隻字"
就o係呢個時候, 有個日本男人(大概係見隻葵花畫得好靚啦!) 就帶埋成班日本婆黎一齊睇, 見宗女提完字之後, 仲成班一齊拍手! (唔知真係以為宗女畫野好叻!!
隻碟真係好靚呀! 又有紀念價值, 真係無價寶呢!
o固晚除左畫碟呢個特別節目外, 另一個節目就係去浸"貸切風呂". 我地4pair人, 分4個時段租用私人露天風呂.
夜媽媽無景睇. 我淨係影左nuts仔入浴照乍! 要睇真人的話, 去問金嫂啦! 佢影左張"背影"呀!
呢晚係4人一間日式房. 我同eric都覺得呢晚係訓得最好的!
雖然話呢間酒店係連續十年入選日本十大最佳溫泉旅館. 不過附近就真係無乜野玩, 如果唔係o甘多人一齊都會幾悶. 真係住一次就已經夠!
(入住時, 仲連車匙都沒收埋, 想夜晚去逛7仔都唔得! 唔知係咪怕人住完唔比錢走佬呢? 
)
留言列表
