星期一係新十五, eric book左枱同我去"大漠"食全羊宴. (結婚報好少可會做呢d野! 
)
可能係之前食滯男女介紹過的關係, 間野成日都無位.
今次難得在元宵book到位, eric就話順便當慶祝埋情人節.
對於食羊的我黎講, 好失望囉! d羊唔"so"無羊味, 唔知似食緊瘦肉定點咁. 
食碟碟菜都好似無乜味. 手抓羊同羊肉拉麵d湯好濃味, 但d羊肉又係完全無味的! 
可以話, 我一定唔會再幫襯!
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
當晚聽天文台講話8:37分有月偏蝕. 由中學開始我就好想睇月蝕, 日蝕, 流星雨呢d天文現象, 不過至今我都未試過親眼睇到月蝕呀...所以食完飯, 就行左去近舊機場附近的空曠地方等睇月蝕. 
我地由8:15坐在一個屋苑外面食住風等呀等...
咁耐嘅? 
你個錶快架, 仲有2分鐘先到8:37呀...
咦...應該夠鐘喇喎, 點解無料到嘅? 
會唔會睇錯日子呀? 
會唔會搞錯左, 係朝早的8:37呢? 
打電話比朋友求助, 得到的回覆係: 
真係晚上8:37呀, 而家你見到個月光, 係開始蝕緊架喇! 食到10:30左右係最勁的!
吓? 蝕多2個鐘先係最勁? 
咁肉眼幾時先睇到佢係蝕緊架?
因為之前已經o係度坐左成廿分鐘食風, 已經覺得有d凍. 確實唔可能再在同一位置坐多2個鐘囉! 
有計!
有個朋友就係住呢後面呢個屋苑架喇, 一於打比佢, 上去佢度坐下吹下水先! 幸運地個朋友在附近, 就番到屋企. 於是我地就上左去吹水同參觀佢間屋.
打搞左人地粒幾鐘, 我地就走喇. 臨走前我地再去望下個月光.....頂! 點解同頭先一樣嘅?! 
之後回家再搵多d資料...原來呢次只係乜鬼半影月蝕. 月蝕期間個月光只係會暗左少少, 而唔係無左一忽! 真係蝕左都唔覺o固隻!
唉...都唔駛失望嘅, 好在食飯時eric都製做左個x食比我睇, 唔駛2分鐘就可以食晒! 呢個唔駛等2個鐘咁耐架! 
.
.
.
.
.
各位觀眾, 呢個係叫"奶凍食" 
留言列表
