HazelECnuts的部落格

中學時我唔係好學生, 雖然個別科目考到全級頭幾名, 又考過十名之內, 不過d先生都唔係好鍾意我, 所以我一直都唔懷念中學生活. 畢業後o甘多年, 一次都無番過去學校. 只有一次坐巴士經過望左一眼.

中學同學之中, 我只有同4-5個同學有聯絡. (有聯絡o既意思, 係知道對方電話而已, 一年都未必會見聯絡一次的!) 

開左facebook之後, 見番好多似曾相識的舊同學名字. 仲見到佢地的生活照...大概知道邊個結左婚, 邊個有小朋友.

其中一位熱心o既舊同學, 提出搞番個舊同學聚會, 唔理係邊一班o既, 只要係同屆就可以黎參加. 就係o甘, 我地昨晚就在尖沙咀搞左個"得閒"同學聚會. (其實我地間中學係叫"德蘭" )  

在facebook約人, 真係有d難度呢! 原本好快已有廿幾人報左名....臨近聚會日期, 先知道原來有d同學仔, 以為呢個只係facebook上的一個group, 並唔知道真係一個聚會. 就係o甘, 有5個人完全失去聯絡, 昨晚就只有18人出席. (都算好喇, 唔係得小貓三兩隻! ) 

昨晚大家見到面, 有d面孔好陌生呀! (有肥左又有瘦左) 有d人識得我個名, 但我對佢完全無印象呀...我真係無心肝!  

最搞笑有人話我瘦左, 又話我皮膚好左...係咩?! 再諗真d, 係喎, 我中三時都有110磅, 仲重過而家, 相比之下真係"瘦左"喎! 讀書時期青春好多, 我塊面生暗瘡生得好勁o既呢! 相比之外, 而家真係"皮膚好左"喎!

就係o甘講東講西, 講下以前學校的趣事, 邊個比人記過缺點....嘻嘻哈哈就講到10點半. 影埋張大合照, 第一次舉辦o既舊同學聚會就完滿結束左!