因為家中有人會在年尾結婚, 所以亞媽就問我有無結婚時親戚的人名單.
呢項係幾頭痛o既一個環節
, 因為你永遠唔會知道親戚/親戚另一半的全名. 要派帖就要四圍問人: 你/你老公全名叫咩野呀? 點樣寫.....
之前搵左一個星期, 都搵唔番結婚時的物品. 我係一個除左錢以外, 乜都儲一餐的人, 所以我好肯定我無掉到d野的.
今日下午得閒, 就的起心肝掀起床下底摷呀摷....搵左個幾鐘頭之後, 終於掘番出黎喇! 
當時的請帖. 其實我最想要勁傳統的大龍鳳, 我覺得結婚就係o甘傳統, o甘老土的. 不過酒樓送的請帖無乜選擇, 所以揀左呢款中西合璧. 
裡面就可以揀大龍鳳.....不過睇下, d龍鳳印到一舊舊! 真係激死! 
仲有當時租衫, 酒席, 人名表, 日程表等等. 
轉眼就黎4年喇, 時間過得真係快! 
當時正值sars高峰期, 好多老人家, 細路都唔敢黎, 所以取消左7圍酒. 酒席期間d伙計仲要戴晒口罩.
慶幸當時無因為sars而延遲結婚. 我老爺2年後就走左, 記得我地結婚時佢好開心, 好彩趕得及斟茶比佢飲, 如果婚禮少左佢, 就會係好大o既遺憾. 
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
換過話題.....除左結婚時的物品, 仲掘出以下呢d出土文物....
在日本讀完一年書, 要回來香港o固陣, 帶得上機的物品, 都帶回香港留念......包括在日本時成日飲的熱朱古力. 到期日係98年12月31日! 
N年前朋友畫黎送比我的型仔比達. (起碼13年前的事!)
來自馬來西亞的名信片.....究竟呢度係邊一度呢?
係亞媽寫比我的. 佢同老豆去左馬來西亞旅行! 1987年7月13日...差唔多21年前! 
*最終, 我老豆都無帶過我去馬拉, 講大話! 
其實我都知, 床下底好多野都無用的, 真係side地方.
只不過我每次摷d野出黎, 一邊睇就會諗起好多好多以前的事. 每一個回憶都好美好! 所以最後我又會慢慢收拾好, 放番落床下底.
好在eric一d都無詐型 
....家中所有空間, 包括書枱, 鞋櫃, 衣櫃, 地櫃, 床下底....超過3份2 d野都係我的. 家用要比足, 不過又只係分到少少位擺野! 有時我都覺得佢幾可憐! 
今日仲搵番第一個男友丁先生的信及合照....嘻嘻..呢d唔駛留喇! 就等佢埋o係堆填區啦! ^^
留言列表
