今日行程係羅馬市內觀光. 早上先去梵蒂岡參觀.
雖然一早出發, 不過羅馬市內塞車, 去到已經10:30. 排隊入場條龍超長! 領隊話預計要排45分鐘! 計落黎, 排到入場後就只有15分鐘參觀!
領隊極力推介, 即使走馬看花, 都一定要入內參觀下! 唯有邊排隊邊自拍娛樂一下.
排左半個鐘, 遠望見安檢入口嘅時候, 突然發現幾十的香港團友之中, 多左d紅鬚綠眼嘅外國人! 我地起哄領隊亦埋去開聲話我地係一團人, 指佢地去龍尾排隊. 不過佢地一家4口照樣面懵懵賴死唔走! 事實證明, 外國嘅月亮無特別圓; 無品嘅人亦無分國藉!
羅馬係出左名多小偷嘅地方. 在落車之前領隊再三提醒大家要留意走近嘅陌生人. 就在排隊入場嘅期間, 就有見過2個女子扮影相靠近; 又有好似打尖咁攝入隊中, 仲扮同前面的人傾計(周星馳o固招)! 當時前面鬼妹的LV手袋打開左, 應該係目標....隔離的團友唔抵得, 開聲提點鬼妹, 嚇到佢即按實手袋! 小偷怒睥一眼後, 好快又走入第二堆人群中搵新目標! (其實我地呢d名牌都無一件嘅死窮鬼, 唔會係小偷目標呢!)
後都有見到人的背囊被開, 唔知係咪已被偷野?
最搞笑的係, eric見到有個男同事的褲鍊無拉, 提醒之時, 佢同事死都話之前有拉上的! (咁...唔通小偷開錯左褲鍊偷錯桃? XDD)
梵蒂岡聖彼得堡真係好宏偉, 內裡好多雕像, 壁畫都好靚! 可惜排得隊入去只剩下20分鐘可以參觀!
咁急, 因為我地仲要快閃去埋鬥獸場!! 真係到此一遊, 落車影左幾張相乍!
望左鬥獸場2妥 今日竟然係去食中餐! 聽到話要食中餐, 團友們都覺得好不安! 去到食肆門口見到3個中國人, 一開口原來係講廣東話的香港人! 咁都安心d!
叉燒炒蛋, 蘿蔔牛腩, 白切雞, 西芹蝦仁....全部都係香港口味! 太感動了!! (事後聽聞另外2部車去了食另一中餐館, 超多味精超難食! 在歐洲好食到好味的中餐真係好困難!)
飯後行程係西班牙廣場自己行. (又比機會團友去刺激意大利經濟!)
路上見到大頭紅綠燈!!
一般團去羅馬, 點會去羅馬許願池! 可惜因為維修關係已面目全非, 所以今個團直情取消呢個景點! 之前做功課知道許願池離西班牙廣場不離, 難得黎到點都要到此一遊, 於是我同eric就首次離隊去探險.
成個許願池被圍上膠板, 金屬架上仲企滿維修工人, 水池乾涸. 雖然係咁, 乾涸的池內仍然被抛滿銀仔! (大家想許願的決心好强! XD) 遊人經過臨時搭建嘅橋上, 匆匆望2眼噴泉上的雕像後就參觀完畢!
在許願池工地的正前方, 有一臨時小水池+一幅雕素畫像. 大家唯有o係呢度頂癮! 真係好可惜呢!
西班牙廣場好多人! 多人到睇唔到個船形噴泉!
團友們爭取時間血拼. 我地就在小街隨意漫步.
歐洲真係到處都係古蹟! 下面呢所教堂外表睇落平平無奇, 但入到去即時嘩嘩聲! 雲石柱+壁畫真係好宏偉壯觀!
到了集合時間, 有2人因付款問題遲了20分鐘回來. 人齊後一齊行上西班牙廣場石級頂部上巴士, 回頭一望見到好靚嘅日落景像!
步行10分鐘到旅遊巴終於開車去食正宗意大利pizza!! 點知剛開車又停車, 原來架車少左1個團友!
就在我地等緊遲到的2人時, 呢位團友又話離隊"去o固邊望下", 結果無人為意佢未回來. 於是工作人員又跑回落廣場揾佢! 最後揾到佢....不過我地架車比原定遲左1粒鐘開車! 老土!!!
去到食pizza的意大利餐廳, cocktail party已完. 原來其餘4架車嘅人都要等埋我地黎先開始食! 因為自私而遲到或離隊, 影響2百人齊齊等, 唔知佢地有無少少內疚?
今晚的正宗pizza好薄不過唔脆, 但都好好食!
公司仲安排左意大利男女高音表演! 不過大概係團友太嘈, 男表演者覺得對牛彈琴, 所以一直黑面!
FWD的tour到今晚係最後一晚, 所以團友們都互相廝殺, 係咁敬酒誓要不醉無歸!
而我地因為join左pro tour會多留4日. 期待明日的天空之城!
留言列表
