今日開始就係自費的side trip(好貴呀!), 唔join嘅人就今日回香港了!
今日要由羅馬坐2個鐘頭車去天空之城, 所以好早就食早餐. 離開酒店後, 經過一輪高速公路, 瞓著左的我feel到巴士不停左轉右轉, 原來已去到山脚開始上山.
天空之城係100個世界快將消失建築物之一, 原本的古城面積比較大, 後來因地震等天災, 令周邊的岩壁逐漸剝落, 只剩下而家的小島形古城.
大旅遊巴去到山脚的停車場後, 我地要轉乘另一14座小巴士上山. 落車地點有幾間餐廳, 沿小路走就到達上古城的唯一小徑.
如在春天或日出時份, 有時會有霧將上城的小徑遮蔽. 由入口處望上山, 古城就好似浮在雲霧之上. "宮騏駿當年就無見到呢個景像, 而創作出天空之城呢個漫畫. 上城的小徑睇起黎好長, 但其實行10-15分鐘就上到去.
一座荒廢了的古城, 實際居民不多, 大部份建築物都變成食肆或售賣紀念品的店鋪. 
行左無幾耐, 離遠就見到一隻貓星人在舔魚皮(? 看起來更像柴皮!) 於是我上前同佢喵2聲打招呼, 再拎出貓零食. 初時佢嗅嗅下唔敢食, 食完一粒之後就岳高頭喵我再比佢食. 在後方的貓群見到, 都一湧而上! 大家一齊望住我喵喵叫, 有d又企起身舉手, 餵同被餵的都好開心!
之後我地快步走開繼續遊覽, 經過一幢靠邊可望遠景的房屋, 門口貼住張紙, 上面竟然寫住簡體字!
仲以為係叫强國人請勿隨處便溺, 點知係話呢間屋要放售, 叫强國人興趣投資就聯絡.....嘩, 連天空之城的業主都睇準强國人的購買力, 果然係强!
其實天空之城內面積好細, 有一所教堂外, 其餘都係d破舊建築物.
繞到另一邊又見到一群貓, 今次d 貓星人更熱情, 直情企起身喵我快d! 餵完繼續行之際, 發現一行6-7個貓星人緊隨後方伴遊, 好疊貓呀!
餵完貓我就就離開山城, 準備回到入口處旁邊的餐廳食飯....咁啱遇到一隻出城嘅陀地貓! (眼神有殺氣)
餐廳座位設在建築物頂層, 可遙望天空之城及後面的山城景色.
今餐食長通粉及魚肉....只要唔係食柴皮豬牛肉的話, 就已經好好食!
店主仲即席表演畫天空之城! 畫得又快又靚!
留言列表
